एनआरएनए दक्षिण कोरियाको श्रमिक–विद्यार्थी हेल्प डेस्क समुद्घाटन सम्पन्न माननीय सरद सिंह भण्डारी भर्चुअल रूपमा सहभागी

सउल, १७ अगष्ट २०२५ – गैर–आवासीय नेपाली संघ राष्ट्रिय समन्वय परिषद् (NRNA-NCC) दक्षिण कोरियाले आज राजधानी सउलमा एक भव्य समारोहका बीच श्रमिक–विद्यार्थी हेल्प डेस्क समुद्घाटन गरेको छ। समारोह भौतिक तथा भर्चुअल दुवै माध्यमबाट सम्पन्न गरिएको हो।

समुद्घाटन कार्यक्रमको अध्यक्षता NRNA दक्षिण कोरियाका अध्यक्ष विपिन कुमार गुरुङले गर्नुभयो।प्रमुख अतिथिका रूपमा नेपाल सरकारका श्रम, रोजगार तथा सामाजिक सुरक्षा मन्त्री माननीय सरद सिंह भण्डारी भर्चुअल रूपमा सहभागी हुनुभयो भने, विशिष्ट अतिथिमा NRNA ICC अध्यक्ष महेश श्रेष्ठ भर्चुअल रूपमा जोडिनुभयो। साथै, NRNA ICC का पूर्व अध्यक्ष तथा एकता उच्चस्तरीय समितिका सदस्य विनोद कुवर विशेष अतिथि भएर प्रत्यक्ष उपस्थित हुनुभयो।

कोरिया स्थित विभिन्न संघ–संस्था, राजनीतिक दलका प्रतिनिधि, पत्रकार, विद्यार्थी, श्रमिक लगायत नेपाली समुदायको ठूलो उपस्थिति रहेको थियो।दक्षिण कोरियामा पछिल्लो समय नेपाली श्रमिक र विद्यार्थीहरूको संख्या बढ्दै गइरहेका बेला उनीहरूले भोग्नु परेका समस्या समाधान गर्न यो हेल्प डेस्क स्थापना गरिएको हो।

यस डेस्कमार्फत श्रमिक तथा विद्यार्थीहरूले:

• भाषागत समस्या,

• कानुनी जटिलता,

• स्वास्थ्यसम्बन्धी विषय,

• कम्पनीभित्रको विभेद तथा दुर्घटना,

• भिसा, अध्ययन र करियर परामर्श,

• अन्य कानुनी प्रक्रिया तथा अधिकार संरक्षणका विषयमा तुरुन्तै सहयोग पाउनेछन्।

अतिथिहरूका भनाइ🔹 ICC अध्यक्ष महेश श्रेष्ठले एनआरएनए दक्षिण कोरियाले सुरु गरेको कार्यलाई वास्तविक र सार्थक भन्दै “श्रम मन्त्रालयसँग सहकार्यमा ‘श्रम संसार पोर्टल’लाई अन्तर्राष्ट्रिय रूपमा प्रयोगमा ल्याइनेछ” भनेर जानकारी दिनुभयो।

🔹 श्रम मन्त्री सरद सिंह भण्डारीले एनआरएनए दक्षिण कोरियाको पहलप्रति उच्च प्रशंसा व्यक्त गर्दै, “नेपाल सरकारले ‘श्रम संसार’ डिजिटल पोर्टलमार्फत श्रमिकलाई एकीकृत र सहज सेवा दिने कार्य अघि बढाइसकेको छ, र यसलाई अरु मुलुकमा पनि विस्तार गर्ने तयारी भइरहेको छ” भन्नुभयो।

🔹 NRNA दक्षिण कोरिया अध्यक्ष विपिन गुरुङले “एनआरएनए अब केवल कुरा होइन, काम गरेर देखाउने चरणमा पुगेको छ। हेल्प डेस्क सुरु भएको केही दिनमै दुई दर्जनभन्दा बढी समस्या दर्ता भइसकेका छन्, जसको सुनुवाइ र समाधानका लागि पहल भइरहेको छ” भनेर स्पष्ट पार्नुभयो।

कार्यक्रममा स्वागत मन्तव्य वरिष्ठ उपाध्यक्ष जित कुवरले गर्नुभएको थियो भने सञ्चालन महासचिव अजय सोडारीले गर्नुभएको थियो।एनआरएनए दक्षिण कोरियाले सुरु गरेको श्रमिक–विद्यार्थी हेल्प डेस्कले यहाँ रहेका नेपाली समुदायलाई समयमै सहयोग गर्ने महत्त्वपूर्ण संरचना बन्ने अपेक्षा गरिएको छ।