भीमफेदीका अनौपचारिक श्रमिक र स्वास्थ्य स्वयंसेविका सामाजिक सुरक्षा कोषमा आबद्ध।

भीमफेदी, मकवानपुर “प्राकृतिक स्रोत कृषि, पर्यटन र पूर्वाधार , सुखी र समृद्ध भीमफेदी निर्माणको आधार” भन्ने मूल नाराका साथ भीमफेदी गाउँपालिकाले एक ऐतिहासिक कदम चालेको छ। आज मिति २०८३ वैशाख १७ गते बिहीबारका दिन गाउँपालिकाले आयोजना गरेको एक विशेष समारोहका बीच अनौपचारिक क्षेत्रका श्रमिक र सामुदायिक महिला स्वास्थ्य स्वयंसेविकाहरूलाई सामाजिक सुरक्षा कोषमा आबद्ध गराइएको छ।

गाउँपालिकाका अध्यक्ष हिदम लामाको सभापतित्वमा सम्पन्न उक्त कार्यक्रममा बागमती प्रदेशका मुख्यमन्त्री माननीय ईन्द्र बहादुर बानियाज्यू मुख्य अतिथिका रूपमा रहनुभएको थियो। कार्यक्रमलाई सम्बोधन गर्दै मुख्यमन्त्री बानियाले श्रमिकहरूको भविष्य सुनिश्चित गर्न सामाजिक सुरक्षा कोष कोसेढुङ्गा सावित हुने र भीमफेदी गाउँपालिकाले यस कार्यमा प्रशंसनीय नेतृत्वदायी भूमिका निर्वाह गरेको बताउनुभयो।

कार्यक्रममा विशिष्ट अतिथिको रूपमा बागमती प्रदेशका श्रम, रोजगार तथा यातायात मन्त्री माननीय जयराम थापाले श्रमजीवी वर्गको सम्मान र सुरक्षाका लागि सरकार प्रतिबद्ध रहेको उल्लेख गर्नुभयो। त्यस्तै, अतिथि जिल्ला समन्वय समिति मकवानपुरका सभापति ललित घलान र सामाजिक सुरक्षा कोषका निर्देशक उत्तम नेपालले कार्यक्रमको महत्वमाथि प्रकाश पार्नुभएको थियो।

भीमफेदी गाउँपालिकामा सामाजिक सुरक्षा कोषमा आबद्ध हुनेहरूको संख्या उत्साहजनक रहेको छ। प्राप्त पछिल्लो तथ्याङ्क अनुसार: कृषि क्षेत्र: १०७ जना,निर्माण क्षेत्र:७१ जनायातायात क्षेत्र: ६३ जना महिला स्वास्थ्य स्वयंसेविका: ४७ जना घरेलु तथा अन्य क्षेत्र: २३ जना जम्मा आबद्ध संख्या:३११ जना रहेको र अनौपचारीक श्रमिकको सामाजीक सुरक्षाकोष खडागर्ने राष्ट्रको पहिलो गाउ पालीका रहेको छ ।

आर्थिक वर्ष २०८२/८३ को चैत्र मसान्तसम्ममा कोषमा कुल रु. ६६,६१,९८३/-रकम जम्मा भइसकेको छ।

भीमफेदी गाउँपालिकाका उपाध्यक्ष सञ्जीव श्रेष्ठले स्वागत मन्तव्य राख्नु भएको उक्त कार्यक्रमको सञ्चालन प्रमुख प्रशासकीय अधिकृत चेतनाथ न्यौपानेले गर्नुभएको थियो। कार्यक्रममा विभिन्न वडाका अध्यक्षहरू, सुरक्षा निकायका प्रमुखहरू, विभिन्न कार्यालयका प्रमुखहरू, महिला स्वास्थ्य स्वयंसेविका, अनौपचारिक श्रमजीवीहरू र सञ्चारकर्मीहरूको बाक्लो उपस्थिति रहेको थियो।

यस कार्यक्रमले गाउँपालिकाभित्र रहेका श्रमिकहरूको जीवनस्तर सुधार गर्न र उनीहरूलाई सामाजिक सुरक्षाको दायरामा ल्याउन ठूलो सहयोग पुग्ने अपेक्षा गरिएको छ।