भीमफेदी गाउँपालिका कोदो उत्पादनमा आत्मनिर्भरतातर्फ ९ वडाका ४३७ परिवारलाई ३३ लाख बढी अनुदान

भीमफेदी,  भीमफेदी गाउँपालिकाले रैथाने बाली प्रवर्द्धन गर्ने नीतिअनुसार कोदो खेतीमा उल्लेख्य सफलता हासिल गरेको छ। चालू आर्थिक वर्ष २०८२/८३ मा गाउँपालिकाका ९ वटै वडाका कृषकहरू कोदो खेतीतर्फ आकर्षित भएसँगै उत्पादन र अनुदान वितरणमा नयाँ उत्साह देखिएको हो।

 गाउँपालिकाको कृषि शाखाले सार्वजनिक गरेको अन्तिम विवरण अनुसार यस वर्ष कूल ४३७ परिवार कृषकले १८९७ रोपनी क्षेत्रफलमा कोदो खेती गरेका छन्। २ रोपनीभन्दा बढी जग्गामा कोदो लगाउने कृषकहरूको संख्या वडा नं. ३ मा सबैभन्दा बढी (१०१ परिवार) रहेको छ भने वडा नं. ७ मा १ परिवार मात्र सहभागी भएका छन्।

प्राविधिक नापजाँच हुनुअघि कोदो लगाइएको क्षेत्रफल बढी देखिए तापनि प्राविधिक टोलीको फिल्ड प्रमाणीकरण पश्चात् कुल १८९७ रोपनी क्षेत्रफल कायम भएको हो।

उत्पादनमा आधारित ३३ लाख ८३ हजार नगद अनुदान गाउँपालिकाले 'रैथाने बाली (कोदो) मा अनुदान कार्यक्रम' अन्तर्गत कृषकहरूलाई उत्पादनको आधारमा नगद प्रोत्साहन उपलब्ध गराएको छ। यस वर्ष कुल रु. ३३,८३,३९४ (तेत्तीस लाख त्रियासी हजार तीन सय ९४) सटअनुदान रकम कृषकहरूको हातमा पुगेको छ।

आर्थिक वर्ष २०८०/८१ देखि सुरु भएको यो अभियानले कोदो उत्पादनमा गाउँपालिकालाई आत्मनिर्भर बनाएको छ। कृषि शाखाका अनुसार यस आर्थिक वर्षमा करिब ५५० मेट्रिक्टन कोदो उत्पादन हुने आकलन गरिएको छ।

गाउँपालिकाको यो सक्रियताले गर्दा बाँझो जमिनको सदुपयोग हुनुका साथै कृषकहरूको आयआर्जनमा समेत टेवा पुगेको छ। कोदो बाली लगाउने कृषकको संख्यामा भएको वृद्धिले भीमफेदीमा रैथाने बालीको भविष्य सुरक्षित रहेको संकेत गरेको छ।