भीमफेदीकी प्रनिता पुडासैनी राष्ट्रिय हक्की टोलीमा छनोट

​भीमफेदी, मकवानपुर

भीमफेदी । मकवानपुरकी प्रनिता पुडासैनी नेपाल हक्की संघले सार्वजनिक गरेको राष्ट्रिय महिला हक्की टोलीमा छनोट भएकी छिन्। भीमफेदी गाउँपालिका वडा नं. ५ निवासी पुडासैनीले आफ्नो खेल कौशल प्रदर्शन गर्दै राष्ट्रिय टोलीमा स्थान सुरक्षित गरेकी हुन्।

​सानै उमेरदेखि हक्की खेलमा विशेष रुचि राख्दै आएकी प्रनिताले निरन्तरको मेहनत र खेलप्रतिको समर्पणका कारण यो सफलता हात पारेकी हुन् । खेलकुद क्षेत्रमा एक अब्बल खेलाडीको पहिचान बनाउन सफल उनी अब राष्ट्रको प्रतिनिधित्व गर्दै मैदानमा उत्रनेछिन्।

​नेपाल हक्की संघले सार्वजनिक गरेको नामावली अनुसार प्रनिता ५ नम्बर स्थानमा छनोट भएकी छिन् । राष्ट्रिय टोलीमा उनले 'फरवार्ड' पोजिसनबाट खेल्ने निश्चित भएको छ ।

​कलिलै उमेरमा राष्ट्रिय टोलीमा अनुबन्धित भएर जिल्लाकै गौरव बढाएको भन्दै भीमफेदी गाउँपालिका र मकवानपुरबासीले उनलाई बधाई तथा शुभकामना दिइरहेका छन् । प्रनिताको यो उपलब्धिले स्थानीयस्तरमा रहेका अन्य खेलाडीहरूलाई पनि खेल क्षेत्रमा अघि बढ्न हौसला मिलेको छ