स्कुल बस सञ्चालनका लागि छलफल आह्वान, जोखिमपूर्ण यात्रा अन्त्य गर्ने प्रयास

भीमफेदी, मकवानपुर

मकवानपुरको भीमफेदी गाउँपालिका-३, ईक्चुङ्गका बालबालिकाहरूको कष्टकर र जोखिमपूर्ण विद्यालय यात्रालाई सहज बनाउन पहल सुरु गरिएको छ। विगत केही महिनादेखि अवरुद्ध रहेको स्कुल बस सेवालाई पुनः सञ्चालनमा ल्याउन विद्यालय व्यवस्थापन समितिले अभिभावकहरूसँग सामूहिक छलफलको प्रस्ताव गरेको हो।

ईक्चुङ्ग क्षेत्रमा माध्यमिक विद्यालय (मावि) नहुँदा यहाँका विद्यार्थीहरू घण्टौँ पैदल हिँडेर वा असुरक्षित ढंगले छिमेकी वडाका विद्यालयहरूमा पुग्न बाध्य छन्। विशेषगरी भौगोलिक विकटता हिउँदमा धुलो र बर्खामा हिलाम्य हुने कच्ची सडकले यात्रा कष्टकर बनाएको छ।जोखिमपूर्ण यात्रा यातायातको विकल्प नहुँदा बालबालिकाहरू खानीका ट्रिपरमा झुन्डिएर यात्रा गर्न विवश छन्, जसले जुनसुकै बेला ठूलो दुर्घटना निम्त्याउन सक्ने खतरा छ।  बाराही मा.विका विद्यालय व्यवस्थापन समिति अध्यक्ष रमेश आचार्यले एक सूचना जारी गर्दै आगामी वैशाख १५ गतेदेखि विद्यालय सञ्चालन हुने जानकारी दिनुभएको छ। विगतमा विभिन्न प्राविधिक कारणले बस सेवा रोकिएको स्पष्ट पार्दै उहाँले भन्नुभयो।

"विगतका समस्यालाई बिर्सेर आगामी शैक्षिक सत्रदेखि नियमित बस सञ्चालन गर्न अभिभावकहरूको साथ अनिवार्य छ। बाराही मा.विमा आएर छलफल गरी एउटा ठोस निष्कर्षमा पुग्न हामी सम्पूर्ण अभिभावकलाई अनुरोध गर्दछौँ।"

स्थानीय अभिभावकहरूले विद्यालयको यस कदमलाई सकारात्मक रूपमा लिएका छन्। तर, यो समस्याको दीर्घकालीन समाधानका लागि सम्बन्धित वडा कार्यालयले मध्यस्थकर्ताको भूमिका खेल्नुपर्ने र सडकको अवस्था सुधारमा ध्यान दिनुपर्ने देखिन्छ।

सबै पक्षको सहकार्य भएमा ईक्चुङ्गका बालबालिकाहरूले ट्रिपरमा झुन्डिएर नभई सुरक्षित बसमा बसेर विद्यालय जान पाउने आशा पलाएको छ।