हङकङ–चीनमा कोरोना पुनः तीव्र, एक महिनामै ३० जनाको मृत्यु

चीन, हङकङ र सिंगापुर लगायतका क्षेत्रहरूमा कोरोना भाइरस (COVID-19) पुनः तीव्र रूपमा फैलिन थालेको छ। पछिल्लो एक महिनामा हङकङमा मात्रै ३० जनाको ज्यान गएको पुष्टि भएको छ भने संक्रमण दर अघिल्लो महिनाको तुलनामा दोब्बर भएको छ।

हङकङको सार्वजनिक स्वास्थ्य तथ्यांक अनुसार, पछिल्लो ४ हप्तामा गम्भीर अवस्थाका ८१ जना संक्रमित मध्ये ४० प्रतिशतले ज्यान गुमाएका छन्।विशेष चिन्ताको विषय के हो भने, अप्रिल ६ देखि १२ सम्म ६.२१ प्रतिशत रहेको संक्रमण दर मे ४ देखि १० सम्मको अवधिमा १३.६६ प्रतिशतमा उक्लिएको छ, जुन गत वर्ष यताकै उच्च दर हो।

एक बालरोग विशेषज्ञका अनुसार, अहिले खोप नलगाएका बालबालिकामा संक्रमण दर अत्यधिक देखिएको छ। “पहिले बालबालिकामा खासै असर देखिँदैनथ्यो, तर अहिले धेरैजसो अस्पतालका वार्डहरू खोप नलगाएका बालबालिकाले भरिएका छन्,” उनले बताए।हङकङकी लोकप्रिय गायिका चेन यीशुन पनि कोरोना संक्रमित भएकी छिन्। उनले ताइवानको काोसियोङमा हुन लागेको आफ्नो कन्सर्ट स्थगित गरेकी छन्।

मुख्य भूमि चीन र सिंगापुरमा पनि उस्तै अवस्था

चीनको रोग नियन्त्रण तथा रोकथाम केन्द्र (CDC) का अनुसार, कोरोना पोजेटिभ दर मार्च ३० देखि अप्रिल ६ सम्म ७.५ प्रतिशत रहेकोमा मे ४ देखि १० सम्म १६.२ प्रतिशत पुगेको छ।यस्तै, सिंगापुरमा पनि कोरोना संक्रमण दर तीव्र गतिमा बढ्दै गएको देखिएको छ। सिंगापुर सरकारले एक वर्षपछि पहिलो पटक सार्वजनिक रूपमा संक्रमण संख्या प्रकाशित गरेको छ। अप्रिल २७ देखि मे ३ सम्मको एक हप्तामा अनुमानित संक्रमित संख्या १४,२०० पुगेको छ, जुन अघिल्लो हप्ताको तुलनामा २८ प्रतिशतले बढी हो। अस्पताल भर्ना हुनेको संख्या पनि ३० प्रतिशतले वृद्धि भएको जनाइएको छ।

स्वास्थ्य विशेषज्ञहरूले आगामी हप्ताहरूमा अझै उच्च सतर्कता अपनाउन सबैलाई सुझाव दिएका छन्।

स्रोत:,चिनियाँ न्यूज एन्जेसी